KURTL KREISCH

Mein Name is Buckl, i wohn im füntn Hieb.

I oabeit glei um d Eckn in an Mittlbetrieb.

I hob a klasse Hockn: I tua Aktn schlichtn.

Dabei oabeit i goa nix – im Prinzip.

I kenn a poa, de haum mit mia zgleich augfaungan,

heit oabeitns in Abteilung via.

De haum glaubt, dass mit Oabeit iagendwie weitakumman.

Jetzt hacklns fünf Schtockweak unta mia.

Weu es mocht ma Schpass a Oaschkreula zu sein.

Do kaun i mein Schef hintn einekreun.

Und daun sog i zum hundattausendsn Moi:

»Jawoi, jawoi! Jawoi, jawoi.«

Vua zwa Joa haums bei uns an Schtreik aungsogt,

i waas goa net genau wofia.

De Geweakschoft hot a poa Hawara zaumgfaungt

und de Postn san gschtaundn vua da Tia.

Oba i hob a geheimes Tial kennt,

do bin i hamlich einekreut.

Daun bin i hoit allanich im Büro drin gsessn

und da Schef hot Augn gmocht und si gfreit.

Vurigs Joa is ma a Ku gelungan,

do woa die gaunze Fiama sott.

De Sekretärin hätt si in Oasch beissn kennan,

weus leida vagessn hot,

dass am siemtn in Schef sei Gebuatstog is.

Nua i alahnich hob draun docht.

Do bin i mit mein Büschl Bleampln dogschtaundn

und hob ois anziga mein Diena gmocht.

Heit bin i jo leida schon in Pension, oba ….

… amoi mecht i no a Oaschkreula zu sein.

Amoi no mein Schef hintn einekreun.

Daun sogat i zum hundattausendsn Moi:

»Jawoi, jawoi! Jawoi, jawoi.«